كل مرة بقول هاي آخر مرة
December 30, 2011 في الساعة 3:08 pm
*جاسر غرايبه
كرة قدم حارات
كل مرة بحكي انو هاي آخر مرة راح العب فيها, برنو عليك الشباب في لعبة فطبول بعد صلات العصر, بحاول اعتذر بس المشكلة انو راح يحملوني مسؤولية 9 شباب جابين يلعبوا وناقضهم واحد الي هو انا عشان تكمل التشكيلة.
بتيجي على حالك وبتقول يلا منلعب, بتمر عليك وسيلة نقل العيية “بكم دايو” قديم مسفط فيه تسع لعيبة بتسفط حالك وبتدندحش معهم حتى تصل مكان المعركة ” ملعب مدرسة الرازي ” ملعب الحلو في انو في عارضات وجوال اما عن الارضية ارضية اسفلت بتلاحظ فيها تظاريس جبال تلال وديان وكأنهم لما زفتوا الملعب نسيو يدحلو الارضية .
بغض النظر عن كياس الشبس والعصير يكمن عامل الخطورة بالقزاز المكسر على الارض يعني اذا وقعت على الارض انتها امرك , وبتصفي العبة لعبة حفاظ على توازن أكثر من أنها كرة قدم.
بعد التقسيمة , في فطبولين واحد مبولم وواحد وزنه خفيف, (مبولم يعني: الفطبول عامل زي لما تنفخ واحد من خدودك وتترك الثاني) بتبلش العبة بالفطبول المبولم. وبعد دقائق بفتعل الفريق الخسران مشكلة احتجاجاً على الفطبول على انه مبولم مما يؤدي الى انحراف الكرة اثناء تسديدها, فلازم نغيره ونلعب بالفطبول الخفيف. مع انه الملعب كله مبولم والعيبة مبولمة ومش موقفة على الفطبول , المهم منسايرهم ومنلعب بالفطبول الخفيف أول ما بتبلش العبة بشوت الطابة ولاهي طايرة آخر ما عمر الله , بعد نص ساعة بحث عن الكرة ومحداش لاقيها منرجع نلعب بالطابة المبولمة اضطرارين.
المهم عن العبة أول عشر دقايق بتكون العبة حلوة الهجوم هجوم والدفاع دفاع , بعدين ببلش الفريق يتعب ويكت. بقود هجمة لصالح منتخبنا ومنتخبنا كله هاجم معي بتنقطع الكرة هجمة مرتدة ما في دفاع والفريق تعبان مش قادرين نركض وراهم منتركهم ومنصير نتفرج إذا حارسنا بصد الطابة برجع بشوطلنا اياها اذا لأ من نرجع نسنتر من أول, وهيك بتصير العبة بصفي فريقنا واقف بمنطقة جزائهم وفريقهم واقف بمنطقة جزائنا وكله بعتمد على حارسه (الي كل قولين بتبدل) اذا صد طابة بشوطها لفريقو لحد ما تخلص المبارة.
المباراة بتخلص لصالح الفرييق الي بجيب 12 جول بالأول حتى لو ضلت لأذان العشاء, وبس تخلص منرجع العشر لعيبه نتشعتل من على السور ومنرجع منتسفط بالبكم وريحتنا جرين وعرق.
بصل البيت وانا بقول هاي اخر مرة راح العب فيها …
